Les Chauvet, menusièrs de Cassuèjols

« Sèm establits aicí a Cassuèjols dempièi 1828.
Dins lo temps fasián tot a la man : las charpentas, las postadas, les escalièrs, las fenèstras, las pòrtas, les mòbles… E atanben les apliches de las bòrias : las carru(g)as, les carris… E mon paire sabiá faire las ròdas amai las barricas. Mon arrièire-grand-paire èra barricaire a-z-Espaliu. E aviái un fraire de ma grand-maire que èra charpentièr a Sent-Amans. Aquò fa que, de cada costat…
Trabalhàvem lo garric, un pauc de merisier e de píbol per las postadas. Lo fau, ne fasiam de dessús de taula, d’apliches.
La charpenta tradicionala, aquò èra de cobles. Tot èra cavilhat. Mès dins las pòrtas, aiquí i aviá de tachas.
Mon paire partiá lo luns e tornava lo sabte a ser. Partiá ambe de plenas musetas : i aviá la varlòpa, lo riflard, las massas, les cisèus… »