Polet a las cebas, quartièr a la vineta, pola farcida e bolhit de vedèl

« Fasiam lo polet ambe las cebas. Aquò èra un polet coma se fa a la campanha. Lo copàvem e lo fasiam rossir ambe quauquas cebas per que lo polet prenguèsse lo gost de las cebas. Al darrièr moment, sovent, tornàvem metre de cebas per pas que totas las cebas se siaguèsson totas desbolidas completament.
Pèi, a la sason, fasiam lo quartièr ambe de vineta e d'uòus. Aquò èra practicament lo darrièr quartièr qu'èra dins la topina quand la vineta arribava. Jusca dins lo mes de junh, se manjava de quartièr a la vineta.
La pola farcida arribava pendent l'estiu. Gardavan los retalhs de cambajon que se manjavan pas, qu'èran pas tan polits, per los metre dins la farça. Fasián pas jamai ambe de carn de salsissa. De còps, aquò èra pas que de ventresca e de lard copat menut.
Quauques còps, se tuava un vedèl dins lo vilatge. Lo monde ne prenián e davalavan aquò al fons d'un potz per lo gardar fresc. Ne fasián de bolhits. »