Los aures copats per crompar de mòstras

« Lo coarro aviá de polits aures a l’abròa de l’Avairon.
Aviá tanben dos cranes enfants que volián cadun crompar una mòstra.
Lo paire lor diguèt :
“Vòstra mòstra, l’avètz al bòsc de l’Iga-Pri(g)onda. Anatz copar de polits aures, portatz-los a Riupeirós e, ambe l’argent, cromparetz una mòstra cadun.”
Çò que fasquèron. Lo boès, lo vendèron, una mòstra en argent per cadun crompèron.
Duèi, après 130 annadas, aquelas mòstras son dins los sovenirs de familha. »